Mae Dewi Sant yn deffro, a gweld peiriant anferth newydd yn yr ardd. Mae’r tatws yn cwyno am y sŵn, ond mae pawb arall yn gwylio mewn cymysgedd o ddiddordeb ac arswyd.
Mae Daf y gath yn sefyll wrth ochr y peiriant. Mae’r Archfadarch yn gwasgu botwm. Mae braich yn dod allan o’r peiriant a dechrau crafu cefn Daf y gath. Mae fflwff ym mhobman.
Mae braich arall yn dod allan o’r peiriant i gasglu’r fflwff, cyn llenwi cronfa yn ei ben. Mae’r peiriant yn grwnan am funud.
Yn sydyn, mae gobennydd yn hedfan allan o’r peiriant, wedi’i stwffio â fflwff Daf.
– Dyma ni, meddai Daf yn fodlon.
– Pwy fydd â diddordeb mewn gobennyddion sy’n cynnwys dy fflwff, y dwpsen? meddai Jeff.
– Gallwn ni hysbysebu, meddai Daf.
